ما في أعلى من صرخة التيّار بوجه الهَندسات المالية... 12/05/2022 قال رئيس التيار الوطني الحر النائب جبران باسيل في مهرجان انتخابي للائحة التيار الوطني الحر في دائرة كسروان جبيل، "بـ 15 أيّار دايرة كسروان الفتوح جبيل بَدّا تبرهن لكل يلّلي خرّبوا لبنان حتى يأذوا ميشال عون، ولكل يلّي عَربشوا عكتاف التيّار، ومن بعدما وصّلهم عالنيابة غدروا فيه...". وأضاف: "لكل الانتفاعيين والحاقدين، هالمنطقة، بَدّا تقول بالصوت العالي: كبيرة عليكم. لا الجنرال بينكسر ولا التيار بيخلص، ولا كسروان - الفتوح وجبيل بتتنَكّر لتاريخ الكبار، من فؤاد شهاب لريمون إده لميشال عون ولا كسروان - الفتوح وجبيل بتتنَكّر لتاريخ الكبار، من فؤاد شهاب لريمون إده لميشال عون". الإنتخابات الجايي رَح تفصل بين خطّين: خطّ الأوفيا لتاريخ جبيل وكسروان والقادرين يبنوا المستقبل مع أهلها. وخطّ الناكرين لتاريخها وراكضين يرهنوا بالمال مستقبل ولادها. نواجه الاحتلال هو شعار أحدُهم، بس أي احتلال؟ نحنا عم نواجه الاحتلال الحقيقي، مش الوَهمي يلّي اخترعوه تا يربَحوا الانتخابات بتخويف الناس". وقال: نواجه، ونحنا ربّ المواجهة, نواجه احتلال القرار المالي للدولة بتفقيرها واخضاعها لطلبات الخارج بالتوطين, نواجه احتلال الفساد يلّي أكل أموال الناس وتعب العُمر, ونواجه احتلال الضمائر والأصوات بالمال السياسي والانتخابي. وشدد على ان المواجهة هيّي نضالنا حتى نكشف الجرايم الماليّة المُرتكبة ونعرف وين إختفوا 73 مليار دولار بحسابات مصرف لبنان، عدا عن الدَين العام المسجّل بوزارة المال، (والبالغ 100 الف مليار ليرة لبنانية و 39 مليار دولار)، ونعرف وين وكيف راحوا أموال المودعين. واضاف: إذا لا بُدّ مِن "صَرخة وطن"، ما في أعلى من صرخة التيّار بوجه الهَندسات الماليّة يلّي إستفادوا منها مجموعة مصارف وبعض السماسرة يلّي ما شفناهم ولا مرّة عم يعترضوا عَ الحاكم المركزي. الظاهر إنّو هَندساتو ساهمت بتمويل لوايحهم بكسروان وبعدّة مطارح. اليوم أخوه لحاكم المركزي رجا طلع من الحبس بكفالة 100 مليار ليرة، يعني 100 الف مليون ليرة، وانتو مليون مش عم تقدروا تسحبوا من البنك! منع سفر وحجز 50 عقار، وأخوه رياض بدّو يعمل الأمان النقدي! هو معلّم كتار من المرشحين، هول بدّكم تنتخبوهم؟ شوفوا معي لوايح كسروان- جبيل: لايحة إستفادت من النظام المالي، وقال: كرمال تعَمّر وطن للإنسان، طيب يلّي بدّو وطن الانسان، بيبيعه وبيشتريه للإنسان؟ بيجبره بخيار سياسي تحت طائلة الطرد! هيدا الإنسان يلّي بدّك ياه ذليل مأمور محتاج، هيدا بدّك تعمّر فيه وطن؟. اضاف: اللبناني معروف بقدرته على التحمل والتأقلم، بدّكن تحوّلوه من انسان دبّير ومبادر الى انسان متكّل على الخارج، ويصير ينطر الاعاشة الانتخابية عند كل استحقاق؟. لائحة ثانية بتموّلها مصارف أصحابها عملوا ثروة من الهندسات الماليّة، وقال شو بدّها تواجه الاحتلال هي ومنصورة. اسألوني انا عن منصورها... ولايحة ثالثة بتتمَوّل direct و fresh من الخارج ومن النَهش والشَفط. لايحة رابعة بتقبَض من الغريب حتى تفجّر التعَصُّب والغَرائز ضدّ فئة من أبناء الوطن. بدّي طمّن المشغول بالهم انّو منسبح ومنشرب مطرح ما بدّنا، ومنرفع كاس لبنان نكاية بكل كذاب و"شيخ" دجال، وما حدا بيفرض على حدا طريقة عيشه، وما حدا بيفرض علينا تغيير عادتنا وثقافتنا. هيك لبنان وبيبقى. في كلّ هَاللوايح … وفي نحنا. نحنا يلّي كنّا ورَح نبقى لكسروان - الفتوح وجبيل، ولكلّْ لبنان، منمثّل الإنسان اللبناني الوطني الحر يلّي ما بيبيع حاله لحدا ولا مقابل شي. واضاف: نحنا عَمّ نواجه حوت الفساد المالي؛ بس إنتو وينكُن، وليش ساكتين؟ بكسروان وجبَيل اهدافنا الانمائيّة واضحة، بدنا المراسيم التطبيقيّة حتّى تصير محافظة كسروان -الفتوح وجبيل فعليّة، من بعد ما نجحنا بإقرار القانون. يلّلي عم بيأخروا صدور المراسيم الخاصة بمحافظة كسروان جبيل حجتّهم مرفوضة، لأنو جبل لبنان بيصير محافظتين متل ما صار بمحافظة الشمال وعكار وبمحافظة البقاع وبعلبك الهرمل، وبمحافظة الجنوب والنبطية، وما حدا اعترض إنّو زغرت المساحة. نحنا فينا وبدنا نعمل سدّ جنة وسدّ بقعتوتة بَس إنتو ليش معرقلين واقلّه متفرجين وساكتين؟ شروعنا مرفأ جونية السياحي يلّي بلشناه بالـ 2017 وعمل منّو النايب روجيه عازار قضيّتو. مرفأ بيخلّي لبنان على خارطة السياحة العالميّة... نحنا مكملين للآخر، بس إنتو شو عملتوا غير الحكي؟ واجهنا لقدرنا نأمّن الموازنة لتوسيع الأوتوستراد الساحلي بكسروان بس إنتو ليش ما سمعنا صوتكم؟ اجت الأموال وانعملت الاستملاكات وتم تلزيم المشروع بعد مناقصة وكان بلّش لو ما 17 تشرين ورح يبلّش. عملنا طريق عنايا- العاقورة وطريق نهر ابراهيم – قرطبا وطريق عمشيت – ترتج. انتو شو عملتوا؟. نحنا بدنا اللامركزيّة الإداريّة وما بتقدر تكون إلّا ماليّة وموسّعة… بس إنتو يلّي عم تدّعوا إنو قادرين تطبقوها، خبروا أهلنا ليش مجمّدين القانون بلجنة الإدارة والعدل يلّي بتترأسوها ولمصلحة مين؟ ومين عَم بتسايروا؟ إطلَعوا من الكذبة… هَون ما في إيران ولا في إحتلال. هون المعركة ضدّ الفساد، وضدّ المنظومة يلّي تسبّبت بالإنهيار وسرقت أموال الناس وهجّرت شبابنا. المنظومة يلّي جزء من مرشحيكم واحزابكم مشارك فيها(من سنين ومستفيد منها. خبّرونا، شو عملتوا ومع مين كنتو وقت يلّي كان الإرهاب عم بيهدّد لبنان واحتل شرق بلادنا؟ خبّرونا بمكتب اي ضابط مخابرات كنتوا تجتمعوا لتعملوا نواب! في واحد لبناني بعدو طيّب وبيحكي وبيخبّر، وفي واحد سوري توفّاه ربّنا بس اخباره شايعة ومصيوتة!. خبّرونا، مع مين وقفتوا وعن مين دافعتوا لمّا إعترضنا على فتح الحدود ودخول النازحين السوريّين بميّات الألوف؟خبرونا، شو عملتوا ومع مين وقفتوا لمّا طالبنا بالتدقيق الجنائي، وتظاهرنا ضدّ الحاكم وتشكّينا عليه وطالبنا بالكابيتال كونترول، وبإسترداد الأموال المحوّلة للخارج؟. المقرر الخاص للأمم المتحدة المعني بالفقر المدقع وحقوق الإنسان بيقول: "المؤسسة السياسية كانت على علم بالكارثة لكنها لم تفعل شيئا يذكر لتلافيها. حتى أن الأفراد الضالعين جيدا قاموا بنقل أموالهم إلى خارج البلاد، بفضل الفراغ القانوني الذي سمح بتدفق رأس المال إلى خارج البلاد. المقرر الخاص للأمم المتحدة بيقول ايضا: يجب البحث عن الحقيقة والمساءلة من باب حقوق الإنسان، لأنه انتهاك للقانون الدولي لحقوق الانسان". واضاف: وين كنتو وشو عملتوا لمّا كنّا عم نقاتل حتى نستَرجع حقوق شَراكة المسيحيّين بالدولة وحقوق لبنان بالغاز وبالنفط؟ خبّرونا، مع مين وقفتوا لمّا تعرقَلت مشاريع الكهرباء والمياه والغاز حتّى يمنعوا التيار يحقّق إنجاز؟ إنتو شو قدّمتوا لكسروان وجبيل غير الحَكي والتحريض؟. شو مشروعكم للبنان غير إسترضاء الخارج والتحريض علينا حتى ننوضع عَ لوايح العقوبات؟ شو مشروعكم للبنان بالسياسة وبالإقتصاد غير إنّو تشتموا حزب الله بالإعلام وتودّولوا بالمخفي وسطاء حتى تتقرَّبوا منّو؟.خلصت الكذبة!. بعض شارك بالمؤامرة بالـ 2019 حتى يفشّل ميشال عون. ولَولاه ما كان شاف النيابة بكسروان، واليوم صار كل مشروعو إنو يشتم ميشال عون حتى يذكّر الناس إنو هو موجود. في قسم تمَسكن وتخبّى بعباية التيّار تيأمّن مصالحو، وعند اوّل هزّة، لمّا وقع الإنهيار، خان الثقة والعهد وصار ينَطنط عَ الطرقات ويتصوّر مع الثوار... في واحد قدّيش نِدم لأنو بلحظة تخلّي قدّم إستقالتو من مجلس النواب ولمّا وعي صار يركض حتى يتراجع عنها بس تأخّر. خلصت الكذبة وبُكرا لمّا بتخلص الإنتخابات بدنا نشوف إذا رح تقعدوا مع حزب الله بالحكومة وبالمجلس أو لا؟ مع مين بدكم تتحاوروا بالنظام والنموذج والحدود والعلاقات مع سوريّا والخطّة الدفاعيّة؟ أو يمكن معكم حقّ. هيدي مواضيع أكبر منكم، إنتوا بتحرتقوا بالداخل ومسلّمين أمركم للخارج. واضاف: سمعتهم عم يردّدوا كتير انّو يلّي رح يصوّت للتيار بيكون عم يصوّت لحزب الله. شوفوا هالمزحة! وانا بالمقابل، بقلّكن: يلّي بيصوّت للقوات، عم يصوّت لإسرائيل ولحلفائها الاقليميين!. سمير جعجع ما بطّل ولا يوم يكون جزء من المشروع الإسرائيلي بلبنان. إسرائيل يلّي احتلّت ارضنا ودمّرت بلدنا عدّة مرّات؛ اسرائيل يلّي لليوم عم تعرقل استخراجنا لنفطنا وغازنا. اسرائيل يلّي بتعتدي كل يوم علينا بالجو وبالبحر ويلّي تاركتلنا نصف مليون لاجئ فلسطيني على ارضنا. وتابع: اسرائيل يلّي فوّتتنا بحروب أهلية وتركتنا بالجبل، وبشرق صيدا، وتركت الناس وراها بالجنوب وهربت. اسرائيل يلّي بتتقصّد تضرب لنا كل سنة موسمنا السياحي، وما بدّا لبنان لا يزدهر ولا يعمر، اسرائيل يلّي ولا مرّة ارادت الخير للبنان، وهدفها تضرب الاستقرار. ساعة بتشغّل جعجع بالمباشر، متل ايّام الحرب، وساعة بالواسطة، متل هالايّام، عبر حلفائها الاقليميين، يلّي هن بيعطوه المال وبيشغلّوه متل اي عميل عنده مشغّل بكل جهاز مخابرات اجنبي بيشتغل بالبلد. يلّي بيصوّت للقوات، عم يصوّت لكل هول، وانتوا بتعرفوا مع هول لشو تعرّض الوجود المسيحي بلبنان وبالشرق ووين صار. بلبنان، من ايام دين براون وفكرة ترحيلنا بالبواخر لأيام فيلتمان، نحنا بعقلهم مشروع ترحيل جماعي دائم. وبالمنطقة، شوفوا حروب اسرائيل والغرب شو كانت نتيجتها على المسيحيين. نحنا بمرحلة مصيرية، عم نلعب لعبة وجودنا ،منروح منسلّم حالنا ليلّي عم يهدّد وجودنا؟. بدّي اتوجّه خاصةً للزعلانين منّا، انا بفهم زعلهم او خيبة املهم وانا زعلان اكثر منهم لأني الجريح الأول بالجمهورية من يلّي صار. بس انا ما لي حق ازعل واقعد بالبيت لأن علي مسؤولية، ولازم يعرفوا، انّو لو معهم حق بزعلهم، تصويتهم له اثر عليهم بالشخصي وعلى البلد. واضاف: اذا ما انتخبتوا او حطّيتوا ورقة بيضا، يعني حجبتوا صوتكم عنّا وعطيتوا افضلية لغيرنا، يعني خسّرتونا. مقتنعين فينا وبتحبّونا بس زعلانين انّو ما قدرنا، مقتنعين انّا اوادم بس بتربّحوا يلّي مقتنعين انّن مش مناح واوادم. هيدي النتيجة لخياركم. اذا انتخبتوا المستقلين او يلّي مسمّاين حالهم مجتمع مدني، يعني راح صوتكم على الفاضي! لأن هول اكثريتهم ما رح يربحوا! انفضحت كذبتهم وخلصت خبريّتهم وما حدا عاد مصدّقهم متل قبل. البعض بيقول بدّنا شي جديد! هول يللي مسمايين حالهم مجتمع مدني لا عندهم برنامج ولا مشروع واحد، واذا وصل شي كم واحد منن، لا بيكونوا كتلة واحدة ولا عندن مشروع واحد، بيكونوا مشتّتين وما بيطلع منهم شي، وعند أوّل تحدّي بيهربوا. وختم باسيل: بكرا الساعة 9:30 على OTV، رح تاخدوا فكرة، بالصوت، عن مدى الظلم يلّي تعرّضت له ندى! ونحنا وراكم وراكم يا دجّالين ولو هربتوا من المناظرة العلنية، ومن المحاكمة العلنية. |
